買左婚戒啦！

成日行街經過金鋪都會睇下D結婚戒指，不過我覺得D戒指好似好普通，好似會同周圍D人一樣，所以一路都好想搵對特別D既！

不過男朋友鍾意CARTIER其中一個系列，所以我地都去睇下，睇下做結婚戒指好唔好！

不過睇完之後，我地都覺得唔係好適合造結婚戒指！

本來諗住行埋過TIFFANY睇，不過我地諗諗下又覺得TIFFANY都係D簡單款，所以都係唔去！

其實我一路上網都有留意有乜野鋪頭整結婚戒指，其實我睇過兩間，一間係SHELLI & COMPANY，另一間係ADIAMOND。上網睇過兩間既WEBSITE，SHELLI & COMPANY無乜款式，有既又唔係好岩心水，ADIAMOND個WEBSITE多D款式，又有D岩心水，於是一心都係諗住同男朋友去果到睇！

ADIAMOND係百利地下，鋪頭好細，坐到3至4人，我地去果時有人係入面買緊野，仲講緊價，於是我地就等，點知等左成半個鐘，老闆見我地等左好耐，就話叫我地坐埋一面，俾D款我地睇住先！

其實我去之前睇過人地係呢到整既戒指，我鍾意佢既刻法，所以先去！

上面果種90度既刻法我覺得好特別！

不過去到我地睇左呢D款之外，我地仲揀左D款！

其實仲有一款我地幾鍾意架，最尾仲係係呢隻同另一隻到揀。不過佢個網無，我又唔記得影低！不過同以下呢隻有少少似，但個面係由好多個平面組成架！

最後，我地揀左一隻我地睇都無睇過既款，就係好似皇冠咁既，佢仲要有兩款，一款上面有三粒石，一款得一粒，我同男友都覺得上面有三粒石似皇冠D，所以揀左有三粒石果一款！

老闆娘同我地講，上面果三粒石可以揀用紅寶石、藍寶石、鑽石，甚至水晶都得，跟住佢就指住粒紫水晶。我同男朋友一聽到都話用紫水晶，因為我地都鍾意紫色，勁開心呀！

跟住個底果到我地就用紅寶石，因為有D顏色好似靚D！跟住仲可以揀個面用磨紗定光面，佢有兩款俾我地試戴，試左我地 都覺得光面好睇D！而個面佢有1粒石、5粒石同一排石可以揀。我地試過，1粒又好似差D，5 粒又好似多得濟，一排平時戴係好靚，但又好似好誇張，我又想我地兩個隻戒指一樣。老闆見我地好似諗唔到點，跟住就話有個客做左隻得3粒石既，話可以戴上手 試下，一戴我地就覺得3粒係最岩岩好！

最後就係刻字，估都估唔到我地揀左一款我地之前無諗過既方法，唔係刻，而係雕字，好似上面咁！老闆娘仲提我地因為皇冠頂果到有三粒石，上面雕D字會細D，所以上面刻日子會好D，咁我地就決定上面刻羅馬數目字既結婚日期，下面就刻我地兩個個名！雕字果到仲可以揀滑面同珠 仔面，由於珠仔面好似襯我地隻戒指多D，所以我地揀左珠仔面！老闆娘仲提我地隻戒指入面仲可以刻字，叫我地返去試戴果時話佢知想刻乜！

隻戒指本來好似$3700/1隻(唔記得左睇幾多錢，因為D盒亂哂)，但我地見頭先有人同老闆講價，就姑且試下！老 闆娘佢一開頭話計到我地最平要$6800一對，但我地只係問左一句可唔可以再平D，佢就話$6600！之後我地問$6500得唔得，之後老闆娘就問老闆。老闆話原本最平都真係$6800架啦，但老闆娘開左口話$6600先，佢計多兩計話是但啦，想早D收工去食飯，所以就$6500俾我地！

做左咁多樣野，我最滿意就係買左呢一對戒指，因為我覺得佢係獨一無二，而且係咁多手工下都可以講到咁便，仲要用一世喎，覺得好抵呀！