籌辦婚禮的心情

由細到大都好想有一個"完美的婚禮"。

自小就覺得結婚應該係由男朋友求婚開始，然後由兩個人共同去諗，共同去籌備同計劃，到結婚當日就係教堂行禮，得到親友既祝福，然後夜晚就設宴同親友分享喜悅。但人大左先發現呢個"完美的婚禮"只會發夢時先會有，真實係好難有架！

到今時今日，男朋友都仲未同我求婚，佢話要諗得特別d令我刻骨銘心。但對於我黎講，求婚果一刻，只要男朋友係真心真 意，有花、下跪同有戒指(睇得電視劇太多！)，又駛乜特別去諗呀！求婚戒指我知佢買左好耐，因為我地去婚紗展果時一齊買，佢話怕我唔鍾意，所以咁岩見到好 既就同我買左！唉，我等左好耐啦，佢都仲未求婚，我其實都係想同朋友講，我嫁得出啫，唔通咁都唔得！

到諗住搵教堂行禮時先知，原來唔係人人都入得教堂行禮，果一下，真係好灰心！因為我係基督徒，但未受浸，男朋友又無宗 教信仰，跟本就無教會肯借教堂俾我地。到我一心諗住算啦，擺酒果時註冊埋啦就算既時候，突然有朋友同我講，原來伯大尼係可以俾無信仰既人book黎行禮， 果一下真係好開心！但當我知道佢係薄伕林咁遠既時候又唔知book唔book好，好苦惱呀！

最慘就係當你好苦惱既時候，你身邊既另一半好似無乜所謂咁，又好似乜都唔理，咁就真係最灰啦！尋日，搵資料搵到好煩果時，肥豬公又掛住打機，講幾句先應一句既時候，真係好唔開心，好想唔結婚呀！不過，佢知我唔開心，之後有氹返我就算啦！

結婚，一生人一次，真係好想搞得好完美，好難忘，但真係好煩！