第一輯PRE-WEDDING BY ADA

去影之前其實同攝影師ADA傾下想去邊同埋想影咩STYLE，佢都好好，借衫俾我之餘仲可以俾我試，有得揀，佢話因為我未影過，所以先俾我揀！

今日，正式去到影，心情有D緊張！

約左11:00上到去，所以自己預早食左早餐仲著好左GIRDLE同埋NUDE BRA，希望快D化好妝出發！結果10:30既時候ADA打俾我話化妝師唔知醒要遲11:30先到！

11:00上到ADA係九龍灣既STUDIO(其實係工廠大廈)，換左衫等化妝師，等到11:20佢終於到左啦！佢叫 YOKO，佢一黎到即刻勁SAY SORRY同勁快開始同我化妝！佢用D化妝品都幾好，全部都係貴野，仲好有心機化！不過中途有個小插曲，就係由於我唔習慣著GIRDLE，結果我食既早餐 落唔到格，我化化下居然嘔，嚇死哂佢地呀！所以各位姊妹，下次都係食完野過一排先好著GIRDLE，避免有D咁既情況出現！

化完妝我都幾滿意！不過我一早同佢講左唔想化到好大個，因為男朋友個樣好細路，果然，佢一見到男朋友個樣就話，"死 啦，唔知點同你SET個頭好！佢個樣咁細個！"不過最後我覺得個頭SET得麻麻，有點老，不過唔駛錢，我又抱住試下影無乜所謂！但夜晚果個妝實在太濃啦， 搞到好老！不過YOKO真係一個好有心機既MUA！

12:00幾，我地終於都出發去影相啦，第一站係教育學院，因為我同男朋友係果到識同畢業。不過，去到唔夠5分鐘，ADA試鏡，居然唔小心跌左支鏡落地，支鏡壞左，佢話得返支長鏡用得，即刻勁灰呀！

結果我地好多想影既相都影唔到呀！仲要浪費左好多時間試鏡！不過，ADA都好努力幫我地影架啦！有D相都幾靚！

跟住我地即刻出發去赤柱影，不過真係少左D鏡可以影既真係少D！不過都有D影得幾好！

呢張ADA幫我地做埋修圖！

影完赤柱，我地都好肚餓，故即刻出發去中環食野，然後先再影過！由於遇岩聖誕節，故有聖誕樹可以影！不過有D我地好想影既電車路呀果D，就因為少左支鏡無得影啦！

不過估唔到呢件造錯左既晚裝影起相黎都幾靚！

由於今日試鏡用左好多時間，所以ADA都好好咁同我地影到12:00幾先走！我地總共影左教育學院、赤柱美利樓、中環聖誕樹、立法會同IFC，不過美中不足係好多景都攞唔到，有D唔開心！

夜晚跟左ADA返去拎相，佢俾哂所有RAW檔我，話我可以自己執相用黎整相簿，又同佢傾左陣計，佢仲教我點可以搵到D FREE既PRE-WEDDING影，真係多謝佢！

擇好左日子啦！

蘇師傅果然係過兩日就打黎呀，我話要2012年新曆3月-6月，9月-12月後既日子，佢居然幫我擇到2013年既年頭，唔知係唔係聽錯左新曆同舊曆呢！

佢幫我擇左既日子有︰

11/3(日)，17/3(六)，

21/4(六)，

12/5(六)，27/5(日)，

3/6(日)，9/6(六)，10/6(日)，

7/10(日)，14/10(日)，

24/11(六)，

2/12(日)

我同男朋友一路都諗住年尾既，因為想儲下錢同埋無咁熱先結！所以揀左

1. 2/12(日)
 因為2012.12.02好似幾好記

2. 14/10(日)
都係因為個日子有齊10, 12同14，好似幾好

3. 7/10(日)

4. 9/6(六)

終於去左擇日子啦！

2月果時同男朋友去左婚紗展，講好左話2012年會結婚，本來話4月同屋企講，但結果拖拖下等左半年。不過男朋友終於都鼓起勇氣同屋企講我地要結婚啦，所以我地終於可以係聖誕假去擇日子！好開心呀！

今日去左搵黃大仙既"蘇東明"師傅擇日子(居然係聖誕節去擇日)！

本來一路都唔知去邊到搵師傅擇日子，不過好在我有睇開ESD Life咋，果到真係好多資料，問過唔同人之下，見好多姊妹都係搵蘇師傅，結果今日就同男朋友去搵佢擇日子，不過擇日子都幾貴，佢收左我地$680，不過佢會同我地訂埋出門果d吉時！

佢話過兩日會打俾我地話我地知全年擇到d乜野吉日，等我仲以為即刻可以知添！不過好開心，佢一路寫低資料果時同我地講，話我地好夾！開心死我！

自製花球

因為影FREE PRE-WEDDING乜道具都無，又唔想用咁多錢買個花球，所以決定自己整個！

平時行開花園街記得有個伯伯係賣花既，所以就同男朋友買完聖誕禮物就去左睇花啦！我同男友都係鍾意紫色，所以好快就 決定用紫色同白色啦！跟住男朋友見到有隻花係白色加金色，覺得影相靚D，所以就買左呢隻！但買唔到我想買既紫色花，所以買左類似既紫紅色，不過全部花加埋 都係$74，而且加埋一齊都幾靚！

我個人比較懶，又諗住只係影一次，所以就咁將D花砌埋就算，然後加埋上次幫男朋友整畢業公仔剩返既絲帶，如果真係有機會再影，先諗住整個好D！

鞋

要影相，梗係要買對靚鞋！不過對鞋又唔係成日影到，所以平平地係"有利"買左對$95，3吋高既銀色鞋，可能遲D自己整D裝飾上去！

男友就係金都買左對白色皮鞋，個款都幾靚，$400有找，仲要佢隻腳勁大要著46號都可以訂！間鋪好似係金都二樓，一上樓梯就見到！

揀場地

其實之前都參加過唔同朋友既婚禮，仲等登去過睇唔同場地睇，又係婚紗展拎過某D場地既相。其實我好早之前睇中左"德藝會"，因為Esdlife 入面好多姊妹讚果到好靚，我地又去睇過都覺得好靚，但佢加價加得太勁，d人又話音響同食物一般。不過最唔好就係因為佢係會所，會有好多做緊gym無著衫既 人行來行去，又唔可以放d佈置出去場出面，入口又難搵，所以最後都放棄左！

跟住我就一心諗住係酒樓設宴，因為係酒店擺酒個價比較貴，我又覺得依家D酒樓裝修仲靚過酒店，野食又好味D。但男朋友鍾意係酒店擺多D，因為佢覺得酒店個感覺華麗D，同埋佢話想俾最好既野我！

其實我聽到好開心，但我又唔想每圍都要俾多千幾二千蚊，因為我地預算唔多，都係岩岩夠錢結婚！不過，由於男朋友鍾意酒店，結果我地都揀左一間酒店咁大把。由於男朋友住柴灣，我住大圍，所以我地諗住揀返九龍區既場，方便d大家既親朋戚友。

酒店CHOICE︰

1. 九龍海逸君綽酒店

 就係因為呢條樓梯吸引到我男朋友！

酒樓CHOICE︰

其實預左一定係煌府架啦，因為我差唔多個個朋友都係果到擺，覺得食物質素好d，佢d場又好靚！

1. THE ONE

個場超靚，超鍾意！

2. 迎

其實本身無揀架，但朋友話幾好，有個露台可以出去睇海景，所以都去左睇！

本來諗住睇多幾間唔同酒樓先決定架，但我地又怕越睇越揀唔到個場，所以都係定左3間揀一間！

男禮服

由於個free pre-wedding無男禮服，所以買埋男禮！其實買之前去過金都睇架，但男朋友嫌佢d款老，又貴，租一套勁普通既都要$1000，所以最後決定都係淘寶買！

白色男禮服︰

送左背心、銀色TIE、銀色方巾、白色方巾、白色BOWTIE、白色腰封。

套衫幾OK，不過條褲太薄同埋D紐扣好鬆！

黑色男禮服︰

 

送左黑色BOWIE、黑色腰封。

一個字形容套衫，正！最後套衫用左HK$246！

但我個衰男友，係COUR CARRE買左件貴白色恤衫$746，幾慳都無用！

淘寶晚裝

之前參加左朋友間公司既最具夫妻相選舉，贏左可以有得影free pre-wedding，不過最後輸左，得第二，無得影！但好好彩，有人留左言俾我話可以同我影，仲預備埋化妝師，但就要自己預備男禮服同晚裝，佢會借婚紗俾我。

既然唔駛錢，我本身又唔諗住係香港影，我呢d師奶仔梗係影啦！為左慳返d錢，我就決定上網買禮服！之前都試過係淘寶買野，所以我今次都上淘寶搵下，睇下有無岩心水，睇左幾日格價，最後就訂左兩套男禮服同兩件晚裝！

晚裝1︰

其實我好鍾意架，仲有得訂造，但收到返黎超灰！件衫造到勁大出入！

上身變左白色，條裙由紫藍色變左紫紅色！結果我梗係要佢退貨，但要我寄返去，由於無時間寄返去，結果要佢退返部分錢俾我！

晚裝2︰

件衫同收到既一樣，不過掛頸條帶太長啦，要媽咪幫我改，另外佢無胸墊，個形有D怪！

我諗第二件都可以結婚當日著返，但第一件就難D啦！

仲未收到法國巴黎既EMAIL

等左好耐，都仲未收到法國巴黎既EMAIL，所以今日再自已SEND多個EMAIL去！其實上次自己去BOOK之前都SEND過EMAIL去，但又係無人應，所以先殺上去！希望今次再SEND去會有人應機啦！

自製結婚公仔

前幾日特登出去深水埗買左LACE同絲帶果D整結婚公仔，但整整下發覺自己唔識整男禮服，唔知點算好。不過，好在有個同事以前讀時裝設計，話可以幫我搵人整！

原本想自己整哂兩件架，但又怕自己整得唔好，結果都係要求人地幫手！不過佢幫我整得好靚呀，仲要無收我錢，所以我都買左份小禮物送俾佢！

女仔係自己整架，同事幫佢加左對耳環同頸鏈等佢似女仔D，我自己就再幫佢搽左D胭脂。男仔套衫件禮服可以除架，入面就咁背心，好型！

BOOK到台灣拍攝時間

因為我同男朋友都係做老師，好難就到時間過台灣影相，又想影完相係台灣玩下，所以最後決定暑假先過台灣影！

特登出尖沙咀BOOK時間，因為好似親身BOOK實在D，又順便去睇下間鋪係點！

首先去左法國巴黎，佢間鋪係地下，但係個商場入面，所以開頭搵唔到！不過佢間鋪幾靚，入面D衫又幾靚，即刻令我信心 大增！我BOOK果時佢問我拎左單NO，就打去台灣幫我BOOK！然後，佢話台灣果邊話我太早BOOK啦，佢話果邊都未出2011年既SCHEDULE， 不過佢同我講，遲少少台灣果邊就會有人SEND EMAIL同我CONFIRM。我BOOK左15/7去影，攝影師用首席，化妝師就用孟宮。我諗住影左呢間先影VIVI，因為男友話想熱左身先影間佢鍾意 D喎！

跟住再搵VIVI，佢係要上樓既，不過佢就易搵好多！上到去，好似入左人地間屋咁，上面得幾張櫈同梳化，搞到我有D 擔心添，不過佢話過多一排就會搬返落去地鋪。佢就咁係本簿同我MARK低左我想BOOK19/7去影，就同我講遲D會有人CONTACT我！我BOOK左 攝影師係俊男(ESDLIFE姊妹推介)，化妝師就用青靖！本來想BOOK梁總監，但又覺得換衫果時係男人唔係咁方便，所以都係用返青靖。

YEAH！期待7月果時影婚紗相！

婚紗展BOOK台灣影相

今年二月係我地第一次行婚紗展，本身無諗住JOIN任何野，只係諗住去睇下到時結婚有乜野要準備！但俾左錢，無理由就咁入去行一個圈，結果我地坐低左係法國巴黎睇相，因為佢本水晶相簿好靚，好吸引！

法國巴黎D相幾靚，相簿都好吸引，但由於我地未諗定幾時結婚，又未有錢，所以我地睇完就諗住走，但當我地諗住睇完走 既時候就有人氹我地JOIN啦！招呼我地既小麗姐係副總，佢開既OFFER好吸引，$8888包36張相，24吋雙面水晶相簿，12吋水晶相簿，掌上本 22張，親友卡12張，30吋油畫，座枱相架連相，女6個造型，男2個造型，免造型師外跟費用，免指定首席攝影師費用，結婚當日借婚紗1套+褂1套，但佢 要我地幫佢做相版，仲話可以落住$2000做定！係呢個咁吸引既情況下，我地當然JOIN左啦！

JOIN完走就再同男朋友行，男朋友話既然都JOIN左一間，我地再行下睇下相，跟住同佢向前行多幾步，佢見到有一間D相佢好鍾意，好岩佢既STYLE，於是我地又坐低左！呢間就係VIVI-薇薇新娘！ 去到坐低有小蓮招呼我地，佢勁NICE，拎左超多相俾我地睇，但由於我地岩岩JOIN左一間，係到諗仲JOIN咪要用好多錢，但男朋友又好鍾意喎，於是佢 第一次好叻咁學人講價！小蓮平左D俾我地，又送多左好多野俾我地，但由於頭先係法國巴黎既OFFER好好，所以我地都努力爭取，睇下可唔可以再多D！另外 一個叫婷婷既女人都坐左埋黎，佢又係咁加野俾我地，但其實我地係想價錢上平D，但佢地話佢地平唔到俾我地，咁我地跟住梗係話考慮下先啦，於是佢地就叫左個 叫梁總監既男人黎！

梁總監係個好搞笑既人，同佢講左好耐，佢終於都平左$1000俾我地，即係個PACKAGE 由$12000-->$9888-->$8888！個PACKAGE包左40張相，18吋相簿，掌上本20張2本，38張已修相片同38張未 修相片的SOFTCOPY，30吋油畫，照片簽名綢1張，座枱相架連相2個，60吋海報1張，謝卡5盒，皇家喜帖12張，親友卡24張，女5個造型，男2 個造型，包鮮花球、煙花、汽球。

其實我地仲睇中左一間架，但我地之前實在太衝動啦，又無上網做RESEARCH，再JOIN就無錢！於是都唔敢再JOIN！

不過JOIN完兩間都有D後悔呀，因為我地都發覺原來D PACKAGE係海鮮價，又無諗到原來加相先後最貴，其他野有無都係其次，所以姊妹們要留意啦！不過既然都JOIN左，所以我都係唔好諗其他野啦！