我的證婚律司

終於都CONFIRM左戴律司做證婚律司，總算搞好哂所有最難BOOK既野。

今日仲收到信，要簽合約同交資料。

要交既野都幾多︰

1. 已簽妥之合約副本

2. 支票$3980 (朋友價都咁貴，仲要乜都唔包>.<)

3. 資料申報表

4. 新郎身份證副本

5. 新郎父親身份證副本

6. 新郎母親身份證副本

7. 新娘身份證副本
8. 新娘父親身份證副本
9. 新娘母親身份證副本

佢咁貴，我以為佢只係包結婚前3個月可以約佢面見一次。好在佢送多一次結婚統籌工作坊，希望幫到我啦，我都唔知跟住應該做咩好。

第六輯PREWEDDING BY 法國巴黎 (第一次修相)

法國巴黎修相同其他公司有D唔同，佢係SEND去EMAIL然後叫我地睇相！

但佢SEND黎既相有D實在太細啦，都睇唔清楚既，不過好就好在唔駛特登去公司睇！

其實佢修既野唔多，都係執下條腰呀，修下塊面，好少野要執！不過可能因為佢張相既MB數太細，睇唔清楚！希望就咁睇完無問題啦！

等佢修好相，我先POST相上黎啦！

證婚律司(confirmed)

尋晚成晚都諗究竟岑漢和律師有無期，如果佢唔得搵邊個好，搞到我成晚都訓唔著，但今日一早又要起身返工，好攰呀！

一起身即刻check email，見到岑律師覆左我email，但係佢既回覆係話佢已經俾人book左6:00係荃灣證婚，即刻幫唔到我證婚。果一下真係一d無哂心機呀，咁唯send sms叫肥豬公唔駛再打俾岑律師，打去問埋林志達律師、戴秉信律師同黃家興律師有無期。

搭緊車返工時，林志達律師打電話俾我 (因為之前果晚send 左email俾佢)，但我聽唔到，於是佢留言叫我打返俾佢。本來諗住放工時打返俾佢，但咁岩肥豬公就打俾我。佢話戴秉信律師有時間同我地證婚而且個秘書好有禮貌，不過朋友價都要$3600+305，仲要咩都唔包。

但佢話打俾黃家興律師果時佢講緊電話，就好串咁叫佢遲d先打黎。於是我就話book戴秉信律師啦，還掂無得用岑律師，只要佢係頭4個是但一個我都無乜所謂。肥豬公居然仲問我，戴秉信律師唔好咩，我覺得佢幾好呀，佢話會係證婚前同我地做個2小時既講解。

我其實同肥豬公講完，真係勁唔開心！提早左兩年幾準備婚禮，一心諗住俾少少野肥豬公做，但無吹促佢做好，結果就book唔到想要既律師。都怪自己唔早d迫佢做野，自己又掛住影結婚相啲野而忘記左仲差一樣重要野未book。

唉，依家要俾多幾百蚊book 律師，又要自己俾錢買羽毛筆、戒指枕、結婚證書套，又over budget。已經無得入教堂行禮，依家想用返教堂模式證婚又用唔到，真係好唔開心。唯有到會面時間下戴秉信律師可唔可以用返教堂行禮既模式同我地證婚啦。

同肥豬公收左線，我就慣性地check下email。林志達律師果然係效率高呀，無覆返俾佢，但佢居然send左個勁長既email俾我。佢話我想book既日子同時間仲有，但一定要我親自打俾佢了解下佢。

以下係佢send俾我其中一段既email︰

本人之收費為港幣4,500元(基於雙方皆為年滿21歲未婚人仕、 日期謹訂於2012年10月14日、婚禮於尖沙咀進行及儀式於5時30分左右開始45分鐘內完成[i.e. 本人於6時15分前離開])，另外閣下須繳交政府收費港幣305元。儀式一般歷時15至20分鐘，而本人安排45分鐘已預留時間作應變之用。本人將可擔任半司儀服務直至宣佈閣下為合法夫妻為止而有關服務不另收費。上述收費之服務範圍包括填寫及遞交擬結婚通知書、見証婚姻條例第12條宣誓、安排身份證明文件鑑正本、見証婚姻狀況之聲明、向婚姻登記處收取婚姻登記官證明書、於安排之日期及時間到達場地舉行婚姻監禮儀式(時限為45分鐘)、見証婚姻條例第21條之聲明、於婚禮完成後即時呈交予新婚夫婦結婚証書正本並安排存檔結婚証書副本予婚姻登記處。因此，如聘用敝行之服務，新郎新娘無須到婚姻登記處候籌。

敝行將不會額外收取任何其他費用如覆印費、車資、泊車費等等。 應要求，敝行將可借出簽名筆、結婚証書簽名冊及介指枕予閣下於儀式當日使用，而敝行所提供之簽名筆、結婚証書簽名冊及介指枕有西式(象牙色)或中式(紅色)以供閣下選擇，有關服務將不另行收費。

雖然敝行預留45分鐘作為儀式之用，不過閣下可放心，本人於實際情況下將提前大約30分鐘前到達場地以便與閣下之弟兄姊妹們(尤其司儀)及工作人員安排閣下一個完美婚禮。

林律師send黎個email講解得好清楚，不過佢真係太貴啦！

我見過戴秉信律師證婚都好流暢好funny，不過最衰係咩都唔包，但我諗買埋d野都無book林律司咁貴。

頭4位證婚律師人選

經過一整日上網搵資料後，能夠睇到律師個樣同合眼緣既暫時有四個。

排名分別係︰


1. 岑漢和律師


地址︰中環德輔道中19號環球大廈18樓1802室

網頁︰http://www.shumhonwo.com/ http://shumhonwo.blogspot.com/

EMAIL︰woshum@yahoo.com.hk

電話︰36679129 97579071

收費︰$3500+$305 (教堂模式證婚，包一次結婚流程講座、提早30mins到場、羽毛筆、介指枕、結婚證書托、鋼印、精美結婚證書套、$1000實惠購物卷、婚享婚禮策劃有限公司婚紗租賃85折優惠)
因為有教堂模式證婚。男朋友唔信教，所以入唔到教堂行禮。但我都好想可以好似人地行教堂咁，可以係爸爸拖住我入去)


2. 林志達律師


地址︰皇后大道中33號萬邦行5樓501-504室

EMAIL︰anthonylam@mklam.com 電話︰25238061 91219822

收費︰$4300+305 (包羽毛筆、介指枕、證書套、提早30mins到場)
網上評語好，但好似好貴


3. 戴秉信律師


地址︰灣仔軒尼詩道1號熙信大廈9樓

網頁︰http://www.munros.com.hk/ EMAIL︰ftai@munros.com.hk



電話︰28623504 91858848 收費︰3300 + 305 (朋友介紹價)
因為朋友用過，自己親眼見過，好FUNNY，識得控制場面


4. 黃家興律師


地址︰九龍彌敦道579號16樓及14樓全層 (近油麻地MTR A1出口) 網頁︰http://www.hklegalservices.com/ EMAIL︰hkm968@hotmail.com hkm968@gmail.com

電話︰23806688 收費︰$3000-3500+305 (包羽毛筆、介指枕)
網上評語好

證婚律師

其實一早就已經睇左邊幾個律司好，但由於一路都掛住整其他野，所以無理到，點知搞搞下得返1年零2個月。我諗再唔BOOK，好多我比較想要既律司都BOOK唔到！

雖然我好急住搵，但係因為肥豬公好多野都唔理，所以我逼佢負責搞證婚律師呢一PART，點知就出事啦！前幾日我 SEND左好多唔同律師既資料俾佢睇，叫佢揀，佢睇哂之後就話揀林志達律師。但當我問佢有無睇幾多錢，有無問有無期既時候，原來係真係"揀"左，但無諗過 BOOK唔BOOK好！我問佢知唔知林志達好貴，我係BLOG友果到睇到要$6500-$8000+305，同埋佢好FULL，要打去問下有無期！結果， 同我諗既一樣，都係自己做會安心D！

由於我實在好怕搵唔到一個想要既律師，所以今日就不斷上網搵資料。我心目中最想BOOK果個係岑漢和律師，因為我覺得佢一望就好順眼，而且又可以揀教堂式證婚。於是我即刻SEND EMAIL俾佢，佢亦都好快咁係1個鐘內覆返我，佢果日8:30有期，但我係想大約5:00證婚，所以我再SEND EMAIL問佢有無其他時間，不過到依家都未覆。

其實我心入面都估BOOK唔到佢架啦，於是SEND埋EMAIL俾劉啟興律師，因為見都幾多人話佢OK，不過佢仲未覆我！

唉，我個心即刻覺得好煩呀！唔知點好！其實我個LIST入面仲有好幾個經常係BLOG友到見既律師名，徐志剛、林志釉、戴秉信、黃家興、黎耀，不過呢D都睇唔到相，又無睇過佢地證婚片段，有D唔放心！

神呀，救你幫下我啦！

我的嫁衣

今日約左2:00去四季水晶試衫，開頭入去Chanel唔認得我同肥豬公。因為我地上次著運動裝去，今次肥豬公就著得好斯文，所以一入到去果時佢叫我地坐低睇相。但睇左一陣佢就問我地拎電話，發現我地原來係未book衫。跟住我就話我係約左Chanel睇衫，所以Chanel睇完我地揀左d咩婚紗之後就帶我地上去試衫。

上到去，一個人都未有，所以佢俾哂我地揀左既四套婚紗我地試，一路試佢一路俾好多意見我，話我適合著d歐式既婚紗，因為我個輪廓深，有似外國人既五官。試左四件我都幾鍾意，跟住佢就拎好多唔同既晚裝俾我試啦。佢俾左好多唔同款式我試，cutie、高貴、low cut、lace，你講得出既都有，仲要咩色都拎俾你試下。我諗我地總共試左十幾件，我諗唔係因為有兩對新人上左黎，佢會再拎衫俾我試，佢真係好熱情。

本來試完我d衫就諗住落返去地鋪，但我問肥豬公佢唔係想睇衫架咩？於是我叫佢快d叫停Chanel拎d男禮俾佢睇，佢試左黑色、灰色、白色，但佢試左韓版、意大利款、英國款、法式，等等，仲要件件都好睇，肥豬公都好滿意。

落返地鋪後我地就傾價錢，我地會租1婚紗(包水昌婚紗)、3晚裝、2男禮，佢話會計我地便d由原來既$12888減 到$8999，再送1伴娘，而且佢送哂我每一套衫既所有首飾(包水晶)。但我記得兩個朋友都仲便，於是即刻打去問清楚佢地既package！結果我既 package係租1婚紗(包水晶婚紗)、3晚裝、2男禮、1伴娘同1褂/紅色晚裝/旗袍。本來想連褂都唔要再叫平d，因為法國巴黎果到包左，但肥豬公怕果到果d會好唔靚，所以就話俾多少少錢買個安心。結果我地就租左8套衫，個價錢仲要平過$8999少少，仲可以轉一次衫。

但我依家成個腦都諗緊，如果兩邊d褂都差唔多，我租多一件紅色晚裝可以點著得哂呢！..........

尋找我的嫁衣

今日教完波，約左肥豬公去睇衫，因為希望係18/8要CONFIRM溫馨之前睇哂！食完野，我地就開始行，諗住行逐間睇。

第一間，我地入左藏愛，佢有好多好多 衫，有3層咁多，個SALE同我講，遲D仲會擴大間鋪。SALE話佢地D衫係自家設計，仲會賣俾其他行家，而且係造衫起家。佢D款比較多鋼紗，而且比較誇張，款的確係好多好多，不過唔係我杯茶！但佢d男禮服真係幾多款幾靚，好多都係韓版。SALE都幾好，會教你咩時段著咩STYLE會比較好，又唔會好 HARD SELL。佢租1婚紗、3晚裝、1西服都要$9388(仲要係計左優惠價)，都幾貴，而且唔肯俾個PRICE LIST我拎走，有D海鮮價既感覺。

第二間，我地就上左法國巴黎，因為我pre-wedding包左一婚紗一褂。但上到去有d失望呀，果到好少衫，仲少過VIVI，一眼睇哂，問佢拎褂睇，佢就話佢地只有五幅褂，佢仲叫我下年4-5月先再上去睇！佢D衫唔係咁靚，所以我都無再問價錢！

第三間，係因為係法國巴黎落返黎俾人捉主先去睇，呢間就係戀愛世紀。上到去係開電腦睇相先，佢話岩先拎衫俾我睇。不過睇完一次，無一件OK，我就話有事下次先黎睇！
外租價錢︰$2380/2套, $3380/4套, $4380/5套, $6880/8套。

第四間，本來想入法國婚紗，因為有朋友係果到借，話果到D衫幾靚，但佢話要係九龍塘果邊先有衫睇，所以拎左PRICE LIST就算，不過都幾貴！
外租價錢︰$3888/3套, $4488/2套, $4988/3套, $5388/4套。

第五間，新婚情報。入到去有個SALE俾左D相我睇，D衫不過不失，不過個SALE有D串，好似俾張PRICE LIST打發我走咁！
外租價錢︰$4088/1婚紗1男禮, $5380/1婚紗1晚裝1男禮, $8280/1婚紗2晚裝1男禮1伴娘。

第六間，U-WEDDING。入到去都係睇相先，但睇到岩佢會拎出黎俾你睇下。佢分左兩條 LINE，JANCIS同LA DONNA。LA DONNA靚少少，JANCIS就好普通。果到D SALE好熱情，好好傾，會教你邊個時段著咩類型既衫，不過佢地好到有D假咁。係咁CHAR我JOIN，見我係到諗就話老闆唔係到可以俾我試下件婚紗(因為我睇到有件幾靚)。試左上身，我覺得件婚紗個拖尾幾靚，但前面差少少，可能試過VIVI果件都係覺得果件正D！試完佢又再CHAR我，不過我話都係要諗下先，因為我對佢D晚裝感覺一般！而且男禮同媽咪衫都係得好少款！
外租價錢︰$3280/1婚紗1男禮(JANCIS), $4680/1婚紗1男禮(LA DONNA)；$4880/1婚紗1晚裝1男禮(JANCIS), $6380/1婚紗1晚裝1男禮(LA DONNA)； $6580/1婚紗2晚裝1男禮1伴娘OR媽咪(JANCIS), $7980/1婚紗2晚裝1男禮1伴娘OR媽咪(LA DONNA)。不過依家做緊優惠，於25/8前落單可以加100多一套JANCIS既衫、男士平腳禮服或其他，最多只係加4套。

第七間，ROSEBAY。之前成日睇雜誌都見過，佢D款都幾靚！入到去睇，個SALE好NICE，好有禮貌，唔HARD SELL。雖然D衫唔多，但D款幾靚，仲可以打去約時間免費試兩件。不過肥豬公好似唔係好鍾意！
外租價錢︰$3988/1婚紗1晚裝, $4888/1婚紗1晚裝1男禮, $5988/1婚紗2晚裝1男禮, $6988/1婚紗4晚裝/男禮/伴娘。

第八間，蝴蝶樹。其實無上到去睇，只係睇左佢樓下本相簿，但樓下本相簿都唔吸引，我諗上到去都差唔多。

第九間，四季水晶。入到去都係睇相先，不過佢D衫一睇就有叮一聲既感覺，係我唯一一間覺得婚紗同晚裝都靚既鋪頭。SERVE我果個係佢地個海外部經理CHANEL，佢話自己係化妝師，所以佢一邊教我邊D衫岩我果時，會教埋我點襯會無咁老，因為肥豬公太 BABY FACE，揀唔岩我就會老過佢好多。唔知係唔係佢係台灣人，所以佢好熱情，講講下又SHOW一件衫俾我睇，一陣又SHOW第二件。但我地話我地趕時間試唔到衫，但佢都帶我地上去望下D衫。佢知道肥豬公貪靚，仲話可以特別造一件借俾佢添，所以我地約左17/8返去試衫，不過佢無俾PRICE LIST我！佢話一定會優惠我喎！

第十間，皇冠婚禮。雖然睇到四季水晶D衫好靚，但由於上次去過皇冠婚禮都覺得佢D衫好靚，所以想帶肥豬公去睇一次。入到去都係上次個SALE PURPLE SERVE我，佢招呼我地坐低先，然後開相俾我睇。 我地都覺得佢D衫好靚，而且佢又拎D現貨俾我睇下，仲要拎親都係我地想睇既！不過佢個價錢貴左D，而且男禮就差少少。
外租價錢︰$6000/1婚紗1晚裝, $7200/1婚紗2晚裝, $8000/1婚紗3晚裝，加租男士平口禮服就$1000

睇左十間，都已經唔想再睇啦，呢個過程實在太痛苦啦，所以我決定只會係四季水晶同皇冠婚禮到揀。兩間D衫都好靚，四季水晶未知價錢，但有朋友租衫就唔駛$2000一套，但皇冠婚禮就有我最鍾意既紫色晚裝，仲要有好多件都好靚。我諗我唔會去溫馨啦，因為D款實在相差太遠，真係一分錢一分貨！不過，又超支啦！

VIVI、溫馨試衫

今日睇完修相，就順手上去睇埋VIVI既衫！

行左一圈，有件婚紗好鍾意，上身係貝殼胸，全條係絹面，拖尾有好多釘工，有D似法巴影果件。

但晚裝既款式唔算好多，未有一件岩心水。不過佢係咁SELL我，話我係VIVI影相會俾優惠我，免左我試身費，叫我試左再諗下！我試左一件婚紗兩件晚裝，件婚紗上左身真係好靚，超級鍾意，但晚裝我就只係覺得一般！佢原本個PACKAGE係$5388包一婚紗，一晚裝，一男禮；$7388就包一婚紗，兩晚裝，一男禮；但佢話我係VIVI客戶，可以免費送多件俾我。佢叫我地坐低諗下先，但我地都係覺得晚裝唔吸引，所以都係話睇下先！不過SERVE我果個叫 BOBO，好有心機，服務好好！

跟住我就過埋對面好多人都係果到租衫既溫馨。上到去果到勁多人，見到周圍都放左好多衫，好似個貨倉咁。等左一陣就有個講野唔多正既人黎SERVE 我，問我鍾意D咩款。我話想要絹面，拖尾要靚既！我問佢有無相睇或者自己睇，佢話唔可以，只可以佢拎出黎俾我睇。佢拎左4-5件婚紗俾我睇，但我都係覺得 一般，所以我就叫佢拎晚裝俾我睇，可惜佢一路拎既都唔係好岩心水，仲要好娘同埋好大陸FEEL！不過佢話試身唔駛錢，所以我試左4件，2婚紗2晚裝，不過我覺得唔係好靚。

試完衫，佢個經理就同我講價錢，當然又CHAR我啦。我話有朋友係到租衫，佢就問我邊個，話可以俾返佢個價我，個價錢係幾吸引既，但佢D衫就真係一般！不過我都相信佢有好多好多款，但唔可以自己睇左先就要JOIN，我又有D擔心！佢FREE左我拖尾果$500，又話本來加衫要加$600，依家加$500，但要我即刻落單。不過我地一路都話想睇多幾間先，所以佢最後約左我18/8返去試衫俾錢，過左果日就無果個價。

我諗，如果真係睇唔到有一間婚紗同晚裝都靚既，我先會返黎JOIN，因為起碼呢到多D款，又平D！

第五輯PREWEDDING BY VIVI(第一次修相)

今日約左4:00去vivi睇修相，佢地終於搬左落去地下66號鋪，唔駛咁難搵！

睇完d相一次，覺得佢大部分相都修得幾好，但有d佢修到肥豬公個鼻扁左，對鞋既污積無修走，有d唔應該係幅圖出現既又無整走到！最緊要係無幫我修走我對勁大隻既手臂同肥腰，不過佔既相唔多！

但佢居然無幫我將我話要改返原色既相改到，香港公司d人話試下幫我追台灣果邊睇下可唔可以改得返，因為佢地話唔到事！如果改唔到就麻煩啦，因為我有兩張相係印係簽名綢，但佢一張幫我改左色，另一張係原色，如果改唔返，就會勁怪！

不過佢d服務幾好，我以為佢係俾張紙我自己寫低邊d要改，但原來佢一路有個人幫我寫低，又會俾d意見我，同埋佢提我d 相如果改左就返唔到轉頭，所以唔岩一定要出聲。而肥豬公變左扁鼻果d佢就話可以send返原相做比較，咁都好d，唔係佢就慘啦！寫好哂佢話大約兩個星期就 會有第二次修相，到時再打俾我約時間睇！

龍鳳鐲

其實我一路都無諗住要買龍鳳鐲，因為我唔想媽咪駛錢。而且買左都係戴果一日，所以一路都無諗住要買。但問過好多人都話租金器唔好，易整爛，又唔化算，再加上表妹今年十月結婚，媽咪買左對龍鳳鐲俾佢，所以阿媽就話，不如早少少買啦，如果唔係又會再貴D！咁佢又講得岩既， 本來$12xxx既時候已經想買，但又唔想用錢住，結果一等再等，今日就已經升到$16xxx，貴左$4000呀！(兩個星期前表妹買都係$15xxx 咋！)

由於之前同大佬講過結婚既野，講開買金，佢話識人買可以免手工費，所以今朝媽咪問完我幾時去買既時候，我中午就打去問大佬幾時得閒，一問之下，佢話今日得，就約埋媽咪去啦！(本來想搵埋肥豬公，但佢又唔聽電話！)

間鋪係荃灣既六福，大佬勁好話既然我係深水埗就順路車埋我去！去到媽咪同表姐都已經企左係門口。入到去搵到大佬識既人，我地就坐低睇！一開始佢拎左d舊式開扣果d款俾我，但媽咪上次買俾表妹果對係扭開既扣款，會少左一粒金珠位，可以粗少少，所以就只佢拎過d款俾我睇！

本來我自己有一對幾鍾意架，上面有好多個喜字，仲要係大大隻，但佢成對要二萬幾蚊，我又唔想阿媽買對貴既，所以無出聲話鍾意！跟住佢拎左d無咁粗既俾我(其實幼左幾mm)，但呢幾mm已經差幾千啦！不過d款就無咁靚，所以你睇我地三個個樣！

不過既然係戴一晚就是但啦，最後俾左錢，量埋重量就走lu。

不過媽咪同表姐提買龍鳳鐲有d野要注意︰

1.要磨砂面，會大方得體d

2.要睇下對鐲側面有無花，因為金好軟身

3.要睇下佢夠唔夠圓，要夠圓先好睇

4.要check下個扣位有無鬆

5.最後有條光身既金邊，望落去大對d

6.最後揀扭開既扣款，因為無左粒金珠，會粗幾mm