今日8:30起身，9:00戀海126既老闆打電話上黎問我地送得早餐未。等佢送完早餐上黎，我地ko左就落去佢到買飛去國立海洋生物博物館(海洋館)，佢賣NT400一張，平過係果到買。跟住我地就行去墾丁大街搭車去海洋館，點知中途有個阿姨問我地去邊，然後話可以
NT300車我地兩個去。搞左一輪，原來要去果到好麻煩，所以我地最後都上左架VAN仔去海洋館。
去到海洋館換好飛我地就入去，諗住睇11:00既表演。但去到都係10:25，所以決定去影左買飛送既鎖匙扣相。點知，前面果家有錢人係到勁影勁買相，搞到我地影完揀埋相都11:10，結果睇唔到表演。海洋館總共有三個館，世界水館、珊瑚王國館同埋台灣水域館。三個館都有唔同特色，不過佢地都有個好大既水池，入面有勁多唔同既海洋生物，有我鍾意既企鵝、白鯨、游水游得好自在既海豹、好靚既紫色魚、珊瑚.......去完就算唔玩浮潛都無所謂。
行哂所有野都差唔多兩點，我地就出去搵車搭走。睇緊點搭車果時，今次有個阿叔問我地搭唔搭車，今次只係要NT200。因為我地見要等多15分鐘先有車，而且仲要轉車，車程又要半個鐘，計計埋埋要成個鐘先返到去，所以最後都係上車走，返去只係用左20分鐘。
返到去，我地去左HOT墾丁旅遊網到買水世界同埋潛艇既優惠卷，但果到個服務姐姐話今日好大浪話落到去都睇唔到野，聽日又無時間去，所以我地放棄左。水世界既飛係呢到買NT260一個，但旺季去到入場要每人補NT50，即要NT310一個。果到個服務姐姐仲話埋俾我地知去邊到玩浮潛好，佢話香蕉灣好靚，但好多漩渦，比較危險，多數人都係去後壁湖玩。問好哂野我地去食D野就去借電動車，租24小時只需NT900，都幾抵。
肥豬公尋日學完，今日開電動車都幾OK。第一站我地去左白砂睇下係咩黎，原來只係沙灘，由於一去到就落雨，所以我地就即刻開車走。然後我地就去左貓鼻頭睇自然景觀。
果到D石幾得意，不過我睇唔出舊石似貓鼻頭。
跟住我地又再開車諗住去後壁湖睇下，點知中途經過恆春區漁會生鮮區，由於我地好肚餓，肥豬公又話入面有魚生食，所以我地就入左去。
我地上左2樓食，間野我唔記得叫乜野食啦，但NT200有勁大碟魚生，仲要好好味！
食完野仲撞到大學師兄添。
開車返去既途中，我地見到有達地方有好多人係到學浮潛，仲要有D好得意既石，原來果到係出水口活動中心，等我地仲以為係後壁湖。
影完相，我見果到有條直路，又無車，我就叫肥豬公俾我試下開電動車，我諗我開左大約20米，肥豬公見我開完，就叫我唔好再開，話我好危險。跟住我地就再上路，不過中途有段小插，就係架電動車車唔到我地兩個人上一條勁斜既斜路，我唯有落車行。沿途我見到有架車想停車載我，我唔敢望佢呀，台灣人真係好！
本來我地仲想去埋南面既燈塔，不過架車得返兩格電，而且又5:30，所以肥豬公話聽日先去，於是我地就開車返戀愛126。返到樓下，肥豬公就話去睇下水世界係邊，叫我自己返上去。但由於果到開7:30，肥豬公話好眼訓，想訓陣，所以佢就訓，我就上網，等到7:15我地先再出發。
水世界係一間叫福華渡假飯店地底，入到去已經覺得唔對路，勁黑勁少人。果到入場會俾一條毛巾你，要用LOCK就要俾NT30再加NT100按金。換好衫放好
野入到去玩，簡直灰爆，得6條滑水道，有2條仲要長期唔開。個人造浪等左成個鐘都無，個8字圈居然係D水流推唔旭，要其中一個人落地推囉。結果係呢個極少野玩既情況下我地頂到9:00就走。如果想去玩既朋友真係要諗清楚，如果知道係咁，我一定唔去！
返去民宿放低D野沖涼後，我地又再開車去恆春睇出火奇觀。果到行落去真係好黑好暗，好在借左大佬支電筒，唔係真係乜都睇唔到。行到落去，就見到地下有兩團火，得意，不過除左呢兩團火就無野睇。
睇完我地就開車返去，不過一離開恆春無幾耐架車就開始無電，最後仲要得返一格KEEP住行10KM，好在最後都夠電返到去。返到去我地買左D生果同去左一間叫AMY'S CUCINA既鋪食PIZZA，果到D PIZZA勁多料，正！
食完野，返到戀海126對出，我叫肥豬公俾我開多次電動車。今次開得耐少少，來回行左2條直路，轉左3個彎，算係行左兩個細圈。不過我有2次差D撞車，但真係好好玩呀，好想再玩！但肥豬公都係果句，我開實在太危險啦！所以真係要讚下肥豬公今日開左咁耐都咁定。仲要尋日先學，搭左幾次車就認得哂D路。另外，岩岩諗起平時大佬車我果時鬧前面D司機唔識開車。我心諗，好在大佬唔係我後面，唔係實係架車到鬧爆我，我諗我都係唔好開車啦，費事要人擔心，又要俾人鬧！
