今日居然唔知醒呀，9:00先起身，所以刷完牙即刻落去食早餐，因為9:30就無得食！食完就去問下有無車可以共乘車我地出去，好在都安排到，都係每人NT350。搭左兩個鐘，終於都出到高雄，搭到我想死！放低D野係都會商旅，我地就出去搵野食！但一路行都好似無乜野食咁，勁多鋪頭無開。高雄真係靜過台北同墾丁好多，條街人都唔多個，所以諗住去左西子灣果邊先搵野食。
我地搭捷運去到西子灣之後，第一站就去左打狗鐵道故事館，因為佢係正捷運出口。
果到有好多舊既蒸汽火車頭，仲要有好多條路軌，但果到周圍都搵唔到野食，所以諗住行完去漁人碼頭果邊食野。
一心諗住漁人碼頭應該係遊客區，點知果到乜都無開，乜都無得食，所以我地就急急腳咁行返出去搵野食。最終我地求其搵左間鋪頭食中式飽飲豆漿就算。食食下，見到出面好多人踩單車，肥豬公就問我想唔想踩。諗左一陣，都好喎，起碼唔駛成日等車(不過我今日著裙囉！)。本來想租二人單車，因為我地都未踩過，但一試就差D炒車，證明我地兩個都係唔岩一齊踩，所以最後都係租返一人一架，每架NT100送水一支。
租左單車我地就出發，中途經過西子灣隧道同國立中山大學
最後去到目的地前英國領事館。
果到其實只係一楝紅色建築物，有少少歷史資料，同一間CAFÉ，無乜特別。跟住我地就去鼓山輪渡站搭船去旗津。
搭船去其實大約十五分鐘，果到搭船會分兩條隊，一邊係人，一邊係車(即係你踩單車或開電單車既意思)。第一次搭船有咁多單車同電單車圍住自己，好得意！去到我地就踩單去上去旗後砲台
果到附近有好多防空洞呀，不過全部都封哂，而個砲台都無砲既！跟住就行上去高雄燈塔，諗住睇下同鵝鑾鼻果個有無唔同，點知高雄燈塔鎖住唔俾人入囉，早知唔駛行到我死死下啦！
見個天開始黑，我地就急急步行返落山，落到山就已經開始落雨，本來想停埋一邊避下，但肥豬公話未必會停，所以我地就繼續踩單車出發。本來係山望到海水浴場想去，
但唔知點解一路踩都見唔到，踩到過左都唔知，而且越黎越大雨，所以都無諗住再去！再踩多陣就去到貝殼館，點知去到已經關左門，想睇都無得睇！但由於實在太大雨啦，我地停低左係貝殼館下面休息，果到好近個海，好大浪呀，仲勁大風，吹到頭都暈！等左一陣佢細雨D，我地就再出發啦，去到風車公園，點知勁灰囉，無野睇！
然後我地踩埋去漁港睇下就返轉頭去海產街買野食。但踩到去無耐，肥豬公就話個肚唔係好舒服啦，所以佢就坐係到休息，我就去買野食俾佢食！食完野，我地去返旗津輪渡站
搭船返去還單車，然後俾肥豬公返酒店沖個涼休息陣。休息果時我地仲係到睇蠟筆小新，睇到唔肯出門口。
睇完小新，我地就出發行去愛河，果到其實只係有好多五顏六色既船係河上面行，無乜特別。
真愛碼頭都只係得個牌睇下，比起看港既維多利亞港差好遠。
最灰都係去城市光廊，又話有好多光既設計，我地搵左勁耐，就只係得呢舊野 ，灰爆，早知唔駛行咁遠黎！
最後去左六合夜市買野食，果到既木瓜奶係除左逢甲夜市之後最好飲既一間！
沒有留言:
張貼留言