台灣之旅第八天 - 九族文化村、日月潭一日遊

今日7:30起身，執野落樓下餐廳食野跟住check out，然後搭8:50南投客運的日月潭線去魚池。原本我地應該係直去日月潭，但因為我book民宿既時候無留意到個地址，以為間民宿好近日月潭，所以book左係魚池果邊。原來間民宿係一d都唔近，仲要係超遠！最慘係今日司機老點左我地落車，我地要去大雁巷附近既新城村，所以係大雁站就落左車。點知有個路人話俾我地知，應該要係下一個站落車。我地見果到叫”巷”， 我諗應該好快行到我地要去既地方。點知行左十分鐘都見唔到路口，最慘係我地推住兩個大行李箱加兩個大背嚢，要行斜路上。不過呢個時候我地出路遇貴人，居然有人停車問我地要唔要幫手。我地就俾個地址佢睇，佢就叫我地上車話車我地去，果一下真係超感動，因為我地行到全身濕洒，又好累！其實車主佢地都唔識路，但佢地真係勁好人，又幫我地問人，又打電話問點去，佢陪我地搵左半個鐘先搵到，好在得佢地，如果唔係我地都唔知幾點先去到！

去到我地住既民宿 “浪漫滿屋戀愛故事館”，老闆就幫我地叫車去九族民化村。由民宿去九族民化村車程大約15分鐘，我諗去到最開心果個都係肥豬公，因為有佢最鍾意既one piece咁岩係果到做展覽。

果到其實有d似香港既海洋公園，有主題，然後有機動遊戲玩。首先，我地去左拎飛睇3D one piece，跟住就落左去一個花園到影相，由於果到太靚啦，我地用左一個鐘係果到影相，所以之後無時間玩。

影完相我地就去睇3D one piece，我係第一次睇one piece，覺得好好睇、好好笑。睇完一出去，點知落勁大雨，所以我地去左d展覽館睇one piece 既 紀念品同模型。不過，好在好快就細雨，然後肥豬公就去玩機動遊戲。由於我係一個膽小既人，唔想俾錢去嚇自己，所以我就決定肥豬公去玩，我就去幫佢影相。不過，玩左兩個機動遊戲都差唔多要行去搭纜車，如果唔係去到日月潭就搭唔到船遊湖。跟住，我地就勁急咁行上山，好多野都睇唔到，不過行上去果d都係介紹不同民族既特色，肥豬公有一跑一路影相，可以之後去睇返。

行到山頂，我地就搭纜車去日月潭再轉巴士去水社碼頭。過到去都3:50，所以只可以搭尾班船4:30遊湖。

由於頭先係九族文化村太趕，無食lunch，所以未夠鐘搭船就去左買野食，買左紅茶蛋捲、杏鮑菇同梅子綠茶做午餐。買完都差唔多夠鐘上船，所以我地上船一路食，一路等佢開。船會開去伊逹邵碼頭同埋玄光寺碼頭，但由於佢係尾班船，所以唔可以落船行，有d可惜。遊完湖返黎都5:30，所以決定唔去集集，留返下次黎台灣先去，所以我地就沿路圍住日月潭行，行到黃昏。果到既黃昏都好靚，不過由於天氣唔係太好，所以睇得唔算好清楚，但係因為落完雨既關係，我地見到彩虹呀，真係難得！

行完，我地就去食野，但估唔到係呢個咁多遊客去既地方，居然無野好食，所以我地求其食左d野，就叫返黃先生車我地返去 (本來想搭的士，但居然去左日月潭咁耐只係見過兩架) ！返到去都係8點左右，為左證明我係因為呢到好靚，但又無睇清楚地址先book呢到，所以我地就落左去影相，我諗呢到除左遠左d都ok呀！