台灣之旅第十二天 - 墾丁砂島、鵝鑾鼻燈塔、最南點、船帆石、香蕉灣一日遊

今日9:15起身，就開始執野，差唔多10:00，肥豬公就出魔幻廚房拎早餐(因為JENNY同老公返左高雄，無人送早餐！)食完早餐覺得個肚唔係咁舒服，所以休息左陣，但因為11:00就要check out，所以肥豬公就自己一個搬左兩件勁重既行李落樓啦(辛苦哂)！

Check out左，放低d行李係戀愛126，我地就開電動車向南面出發。第一站我地去左砂島。

砂島被劃為保護區所以入唔到去(我企緊果到後面好靚果個沙灘先係)，因為果到d沙係由貝殼形成，好特別。我企緊果到就有好多珊瑚礁，所以好多人黎執。
 
第二站我地就去左鵝鑾鼻燈塔

我開頭以為係全島最南點，直至我地行完成個鵝鑾鼻公園既步道之後，肥豬公問人點去最南點先知。最南點原來係出返公園向佳樂水方向行多20分鐘。

 果到有呢個尖錐形既野作記認，果到勁好風，望出去個海勁靚架！

第三站係船帆石，因為我地要去迦南美地問下會唔會有機會幫我地安排到車車d行李黎，點知係無！另外，我地就睇下近我地住既地方有無沙灘俾我地去玩！開頭見唔到，好在向前行大約5-10分鐘有一個，咁我地就可以照計劃過左黎船帆石呢邊先玩。問完我地就去埋香蕉灣

果到d水真係好靚呀，勁藍勁清，企係岸到向下望都可以見到水底，不過我地決定唔玩浮潛，因為我對水無乜好感！

去埋香蕉灣我地就開返架電動車返墾丁大街還，因為我地租到3:00。但因為返到去未夠鐘，我地就開住架車係咁遊黎遊去影相，哈哈！今日終於第一次可以唔駛停咁轉到彎啦！

食埋野，我地就搭的士拎埋d行李去迦南美地，咁近都要NT200，不過唔CALL又唔得，D行李真係太重，唔知點拎！

去到迦南美地，原來我地住頂樓，真係辛苦肥豬公又拎住D行李上4樓。本來我都嬲自己做乜要無啦啦搬去船帆石果邊，因為頭先黎果時見到呢邊無野行，無野食，不過上到房就一D咁既感覺都無啦！

我地住係迦南美地既地中海館，果到超靚呀，有超級大露台，間房同個景都超靚！

見到呢到咁正，就無再嬲自己啦！

執好哂D，我地就換衫去最近既沙灘玩。由於我唔係好鍾意游水，D水上遊戲又無乜兩個人玩到既，所以我地都係行下坐下，最後由於太無聊啦，我地兩個居然係到堆沙，整左個大浴缸俾自己。

玩完水返去沖完涼洗完衫我地就出發食野。由於行出沙灘既時候發現呢到無咩好食，諗左好耐，我地最後都租左架電動車NT200/2HRS出返去墾丁大街食野。不過好奇怪喎，尋日星期四條街靜到爆，仲要D鋪好早就關門，勁少小食檔開。但我地黎到果日星期三又唔係喎，黎到今日星期五仲多左好多車仔鋪添，真係唔明點解！

 夜晚既地中海館好靚呀！