今日食完lunch就去法國巴黎試衫。去到等左一陣，佢既服務員就話聯絡開我既淑菁出左去，搵依倫(普通話唔係咁好，唔知有無聽錯)同我試衫。試衫既地方係地牢，下面都幾大，衫都算幾多。落到去，依倫就問我有d咩衫鍾意，有d咩款唔想要，跟住就帶我睇衫。我一路睇，佢就會一路介紹，話俾我知邊d衫著住黎影相靚，邊d衫平時唔會試既，依家試下無仿。另外，佢仲會自己去拎d衫俾我試，話影相出黎既效果會好好。
今次可以揀6套衫，我大約試左20幾套衫。當中有d顏色既衫我一定唔會揀，就係黑、綠、橙紅，因為vivi影左，而我既target就係紫色、黃色、藍色、紅或桃紅色。試完所有衫，就只係揀到紫藍色公主紗裙。其實有件淺綠色既晚裝幾靚，但由於影左綠色，唔想再影多次，而我又好想要一件黃色晚裝，所以問佢呢個款有無黃色。但佢話無，我覺得試左既黃色晚裝好似無款ok咁，所以我就叫肥豬公返轉頭幫我睇，好在佢揀左一件我上網睇過想試，頭先睇唔到既。試左即係覺得可以接受，雖然唔算好靚，但由於我好想有一件好sharp既衫，所以就揀左果件。另外，試左三件桃紅色同紅色既晚裝覺得ok，一件係vivi都試過想揀既桃紅色拖尾晚裝、一件係sharp桃紅色公主紗裙同埋一件紅色黑色前短後長既紗裙。其實我最鍾意桃紅色拖尾晚裝，上次係vivi都想揀，但肥豬公話公主裙好睇d所以無揀到。如果上次揀左桃紅色拖尾晚裝，我今次就一定會揀sharp桃紅色公主紗裙，因為我覺得呢條靚過vivi果條橙紅色公主裙。而點解會揀紅色呢，就係因為個款特別。但依倫話婚紗都有d可以做到咁，可以唔揀呢條。由於搞左好耐都決定唔到，所以佢叫我試左婚紗先。
佢拎左兩條短婚紗可加拖尾既俾我試，我試左兩件就覺得第一件好特別，所以即刻決定要呢條同埋byebye紅色黑色前短後長既紗裙。依倫話我揀左一條短既佢建議我搵條拖尾好靚既婚紗，我都覺得係，因為vivi揀果時我都無揀到一條好靚既拖尾裙。試左好幾條，唔係太重就太可愛，佢本來拎多一條俾我試，但淑菁(佢係我中途試衫返左黎，一路同肥豬公傾緊路線)怕我花多眼亂，叫我唔好試。但由於決擇唔到，所以肥豬公叫我試埋果條。好在有試咋，一試即刻愛上，因為個拖尾好高貴好靚，就咁就搞掂左婚紗果面。
試完婚紗要決定返晚裝，首先係桃紅色拖尾晚裝同sharp桃紅色公主紗裙之爭。雖然兩條都好鍾意，但無理由揀同一個色系，亦由於上次呢個tone影過公主裙，所以最後決定揀桃紅色拖尾晚裝。而我既target就剩低藍色，得返水藍色雪紡裙、淺藍色白藍玫瑰花紗裙同埋高貴既深湖藍色晩裝。我鍾想揀水藍色雪紡裙，但肥豬公話個款唔好，但我又覺得淺藍色白藍玫瑰花紗裙太cuite，依倫又話影相唔會影到d花花，而我又覺得深湖藍色好似有d老，所以唔想揀。經過一輪討論後，肥豬公終於都由得我，揀左水藍色雪紡裙。
搞掂哂之後，同肥豬公傾下d衫，講講下先記得係香港希臘女神影左淺藍色衫，所以決定返去法國巴黎改衫。不過改既並唔係我地之前講既衫，而係一件個款好grand既灰銀色晚裝。搞掂我地就去淡水行同食野，淡水既日落真係好靚，不過行完呢個紅毛城同真理大學後，真係腳都斷。
沒有留言:
張貼留言