台灣之旅第九天 - 清境一日遊

今日8:15起身，執野落樓下餐廳食野跟住check out。不過食左咁多日既早餐，除左自己俾錢出去食既，無一間酒店同民宿既早餐係好食，所以我無乜點食到野！食完早餐，我地就call返黃先生車我地埔里，車費為NT300，然後我地再轉10:20南投客運的翠峰線去清境。

今次，我地終於落岩車啦，11:30就去到見晴山莊既來福居落車。係落車前，我地見到好靚既老英格蘭，所以就行返前去影相！果到真係好靚，好靚，其實之前睇書見到呢到係影結婚相既新景點時都已經好想黎，但住係到真係超級貴，要成$5000，就算入去影結婚相都貴到爆，不過果到既歐式建築真係好靚！

由於老英格蘭實在太靚啦，我地係果到影左45分鐘相，本來諗住自己慢慢行去青青草原，但既然都已經12:45，所以決定搭民宿1:30開既車去青青草原。見有時間剩又怕去到青青草原無飯食，所以諗住係見晴既餐廳到食，但我地得兩個人實在太難叫餸食飯啦，所以過左隔離7仔食叮叮野。不過，估唔到台灣既叮叮野食野過香港既十倍囉，唯一唔好既係唔知點解間7仔咁多烏蠅。食完，我地就搭車上青青草原，車程只需要5分鐘。

 

去到青青草原就買飛入場，由於佢計暑假係假日，每人入場費要NT200。入到去就見到好大片綠色草地同埋好多羊呀，好得意，D人仲係咁餵D羊食野！

行左一陣，等到2:15我地就行去睇2:30既剃羊毛表演。牧羊人一開始就示範點用牧羊狗趕羊，然後教點用條鞭，又同觀眾玩遊戲，最後先剃羊毛。整個過程個外國牧羊人都好搞笑，好識帶動氣氛，個表演大約30分鐘，真係好值得睇。

睇完我地就周圍影下相，食左條羊奶雪條，不過無乜特別。等到3:45就行左去睇馬術表演，可能我唔係好識得欣賞，我覺得唔係太好睇！然後我地就行返轉頭買呢到好出名既水蜜桃、玫瑰李、蜜桃李同西瓜李食，果然好出名，真係好甜好好食！
行完青青草原，我地就沿步步高阩步道行落去清境農場旅遊服務中心，食免費既羊奶手工銅鑼燒同泡芙，然後買左第一份手信 – 清境牛奶糖同羊奶糖。然後肥豬公話帶我去食雪糕，中途再買多三個 “妖受甜”(台語意思係好鬼甜)既水蜜桃返去食。去食完薰衣草同檸檬草雪糕

，就行落去小瑞士花園影相。由於咁岩遇著100清境風車節，所以周圍都好多風車，

去完小瑞士花園，我地就行返去見晴山莊食晚飯，因為我地訂左一泊二食(即包晚餐及早餐)，總共有5餸1湯，都幾好食！食完就返房啦，果到d職員勁好，幫我地搬左d行李上房。民宿果然係平靚正呀！