今日8:30起身,起身行出露台收衫(因為帶唔夠衫,日日都要用手洗,洗到手都爛),原來我地個露台望出去都好靚架!
9:15就落去勁急咁食早餐,因為餐廳9:30就無野食,而且食完要返去搬行李。嘩,拎住果兩個大行李箱,行兩層樓梯落黎,真係辛苦到死!拎完行李CHECK OUT,我地就過對面等南投客運去埔里,再轉車去台中高鐵站。
架車明明應該10:00先係翠峰開,但係未夠10:00就落到黎見晴山莊對面,好在早左出黎等,唔係要等多20分鐘先有車。搭左一個鐘頭車就去到埔里,原本諗住搭11:20既車去台中高鐵站,點知一落車,後面就黎架車係去台中高鐵站,於是我地即刻搬行李上車再去買飛。結果,我地原定12:20到台中高鐵站,變左11:55就到左,所以可以搭早D 12:22既高鐵去左營。
去到左營比原定既1:36早左7個字,而我地又約左共乘(即係同D唔識既人4個人搭一架的士,好似香港既泥鯭的咁)既司機1:45-2:00接我地,於是我地就勁急咁行左去隔離三越到食野。但食緊既途中,司機已經係咁打黎吹我地,所以我地勁急咁食完即走。點知普通話好叻既肥豬公,聽唔明司機叫我地去邊到等,
搞到司機要由本身等我地既地方再過黎接我地!由於我地有兩件大行李,司機要接既乘客係機場黎,佢怕上唔哂D行李,所以本身接我地果架4人的士叫左另一架6
人的士車我地。司機去機場接埋另一對情侶我地就出發去墾丁。
司機手車都幾快,原本要2個鐘既車程,佢80分鐘就到,而且中途佢仲停車,叫我地望向個海,因為出面有好多坦克車係到做實彈練習。由朝早10:00搭到
4:00,終於都到墾丁我地住既民宿
"戀海126"啦!我地間房係4樓,叫情海,但係呢到係無電梯架,搬行李搬到叫救命呀!不過間房好正呀,有露台又向海,但佢聽日呢間房租左出去,我地要轉房呀!
放低行李後本來諗住快d出去,但唔知係唔係搭得太耐車,個頭勁暈,塊面勁紅,沖完身個人都仲好慶,於是休息左陣先出去。休息左一陣都係咁,所以我就話出去行下,睇下會唔會好d。跟住我地就搭屏東客運去恆春,去左海角七號既拍攝場地。不過,果到真係普通屋一間,無乜特別。
影完相,我地就去食d野。我地去左食夥計之家鴨肉冬粉,果到d野真係幾好食,值得一去。
食完,我地就諗住行下東南西北門 (呢4座城門係國家二級古蹟)
,再去睇出火奇觀。但我地唔記得帶電筒,同埋行過去好似好遠,所以都係諗住聽日開電動車果時先去,費事行。行多一陣,發覺呢個古城實在太舊啦,所以諗住去食埋 "董娘的店"既糖水就走,點知搵左咁耐,肥豬公睇返書先發現佢係2:30就休息。
無得食糖水,我地就搭車返去墾丁大街行下夜市。條街真係好長,好多人,逼到爆呀!諗住呢兩日去玩水,但我又無沙灘褲,於是就周圍睇,行哂成條街,終於都買到條平靚正既沙灘褲,只係NT150(點
知,返到去著,實到太肥,D肥肉出哂黎)!不過人買肥豬公又買囉,明明佢自己有好多條,都仲要買,不過算啦,佢果條仲平NT100。
買左野食同野飲,肥豬公就送我返民宿,諗住自己出返去按摩,因為佢訓得唔好,成個背都拉住左(我做左咁多日骨妹都仲話痛)。點知返到去,老闆娘勁好,怕我地聽日開唔慣電動車,幫我地問佢個老闆借架車俾我地試下開。不過,為左慳返d錢,我地兩個人一架,肥豬公開,我坐!其實我都好想試下開,但肥豬公話我咁咋,一定開唔到!試完車,佢就去按摩,我就去沖
涼!
聽日一定要試下自己開電動車先!
沒有留言:
張貼留言