台灣之旅第六天 - 第六輯PREWEDDING BY 法國巴黎

今日8:00就去到法國巴黎化妝，點知去到果時另一位化妝師話夢宮老師未到，叫我等一陣。等左10分鐘，就有一個紅 色短頭髮既女士叫我去化妝。佢叫我放低野，就問我要唔要搽安瓶，我話我有帶，佢就叫我拎我自己既出黎用，完全無sell我買安瓶。佢先同我化妝，化左一 半，佢就有個助手過黎同我電頭。當化好妝，電好頭，佢就叫助手同我試衫，佢就同肥豬公化妝。不過試衫既過程發現法巴改衫真係唔係幾掂，我差唔多每一件都要 再改，不過佢又改得好快喎，5分鐘就搞掂。著好婚紗上返去，夢宮老師就同我set頭。頭先電頭髮果時佢俾左本書我睇，叫我揀D款俾佢，不過我只係講左唔想要D咩款，因為我覺得佢咁專業，佢幫我諗個頭點set會好d。set完頭我地就出發，而夢宮老師就話因為去完自來水博物館會經法巴，佢話留係到等我返黎換衫set頭，係到set會舒服d。

今日既行程:

自來水博物館(每人NT60入場費，停車場NT20一小時)-->陽明山-->大屯農場(NT800入場費)-->淡水教堂-->淡水沙灘-->漁人碼頭情人橋(NT60停車場)

今日幫我地影相既係首席攝影師賴桑，佢影D相好有情調、好浪漫，同VIVI俊男既風格好唔明。而佢同佢助手阿元都唔係點出聲，不過慢慢佢地就多野講左好多，同埋影到夜晚唔知係唔係夕陽同夜景係佢拿手好戲，所以佢要求特別高，不過我諗影出黎會幾特別，期待聽日睇相。

 

夢宮老師亦都同VIVI既青靖老師(今日係大屯農場俾佢見到，怪怪地)好唔同，佢唔係好出聲，唔係好投入拍攝過程，換妝亦都無青靖咁快，不過佢真係會同你執得好仔細，一定要你靚同滿意先放你走，我亦都好滿意佢同我SET既頭，仲要無一個同之前影相既一樣，SO GOOD！

6個造型都唔同，優雅、高貴、可愛，乜都有齊！