台灣之旅第一天 - 第五輯PREWEDDING BY VIVI (試衫)

今日終於出發去台灣影相啦，尋日執野執到好夜。今朝一早5點就起身，依家好眼訓呀！8:15機，11:00就離開桃園機場，搭飛狗去酒店，不過中途要轉車！不過落左車一望就望到VIVI同法國巴黎，兩間鋪都好近酒店，5分鐘都唔駛就到，SO GOOD！去到百利都12:00幾，放低行李過對面食野就行過VIVI。

佢間地鋪同揀衫既地方係分開，要行去另一楝試，不過都好近。揀衫果時都唔係好多選擇，我總共可以揀5套呀！我揀左黑色A LINE、粉橙紅色公主裙、綠色A LINE裙、白色拖尾白紗、淺粉紅色蛋糕裙婚紗。其實我得3套鍾意，就係黑色A LINE(因為著左好似好高貴)同兩套婚紗。果到D衫唔係咁靚，試左20幾套晚裝，10幾條婚紗，但都揀唔到好鍾意！本來我試左紅色短裙(有D似米奇老鼠)，諗住揀，但又好似同粉橙紅色晚裝好似；想揀桃紅色A LINE拖尾晚裝，因為個拖尾好靚，但又係同粉橙紅色晚裝好似，試衫姐姐話唔好揀D咁似既顏色。最後揀左條綠色A LINE晚裝，因為佢著得我面色好睇D。其實粉橙紅色公主裙麻麻地鍾意，但阿威同試衫姐姐都話我著果套好睇，所以先揀果套。不過值得一讚係試衫姐姐ANGEL好有心機，大概知道我鍾意D咩款後幫我揀衫，又推介邊套特別，真係唔該哂佢。試完佢帶返我地落地鋪，見到小蓮同俊男。由於今日黎到台灣咁耐就落雨落足咁耐，所以我同佢地講有D擔心，不過佢地話佢會搵定台灣邊D地方無雨帶我地去，希望聽日會停雨，可以去到我地想影既地方。跟住ANGEL話俾我地聽要去對面馬路既另一間鋪試男裝。去到黑色同白色都係得三個款揀，就係一粒褸、兩粒褸同三粒褸，而背心就要加錢！本來自己係香港買左背心同豬腸TIE果D，不過肥豬公試左一套灰色背心又好似幾好睇，所以我就叫佢加錢租，咁就用多左NT1500。

夜晚，同肥豬公執左聽日影相既野就出去搵野食同行下，結果我地行過左兩個捷運站，去到台北車站，行左三越既三個館。最緊要既係居然俾我係三越買到鹹超呀！不過太貴啦，只係買左兩樣。